ዳሪና ቀባሪ (ወለላዬ ከስዊድን : ምንጭ ከኢትዮጵያ ዛሬ)

 

ዳሪና ቀባሪ (ወለላዬ ከስዊድን)

ዳሪ

ወዳጄ እንደምነህ – ውዱ ጎረቤቴ

ባለህበት ቦታ – ይድረስህ መልዕክቴ

የልጄ ሠርግና – የሟች ልጅህ ቀብር

አንድ ላይ መሆኑ – ፈጥሮብኛል ችግር

መቼም ይገባሃል – ግልጽ ነው ነገሩ

ብዙ ነው ማዕረጉ – የሠርገኛ ክብሩ

ስለዚህ አደራ – የልጄን ታላቅ ሠርግ

በደስታ በሆታ – እንዳሳልፍ በወግ

በዛ ቀን ተነስተህ – ልጅህን ስትቀብር

ሰዎችን ሰብስበህ – አታብዛ ግርግር

እንደውም ጨርሶ – ከሞት ላታድናት

በሳቅ በደስታ – በ’ልልታ ቅበራት

ለለቅሶኛው ሁሉ – ይኼን ንገርልኝ

ነገ ማታ ድረስ – መልስህን ላክልኝ

**********************

ቀባሪ

ክቡር አስተዳደር – የላኩልኝ መልዕክት

እጅግ አስገራሚ – ድንቅ ነው በእውነት

ታስራ ተገንዛ – ልጅ ልትቀበር

ተሞሸረች አሉኝ – የርስዎ ልትዳር

ለክብርዎ ሲባል – ለርስዎ ወግ ማዕረግ

እንድስቅ አዘዋል – ለቅሶዬን በመንፈግ

እንደዚህ አድርጎ – ቀኑ ከከበደ

በርስዎ አስተዳደር – ታምር ከወረደ

ኀዘንና ደስታ – መውጣቱ መውረዱ

አንድ ስለሆነ – ሁለቱም መንገዱ

መቼም ምን ይደረግ – በእልልታ ልቅበራት

እርስዎም ልጅዎን – በለቅሶ ይዳሯት

ወይም ደስታ ኀዘን – እንዳይቀያየጥ

ስምምነት አ’ርገን – ቤት እንለዋወጥ

እግረ – መንገዱንም – በዚህ – አዲስ መንገድ

መከራን ይቅመሱ – እኔም ደስታ ልልመድ

ዳሪና ቀባሪ (ወለላዬ ከስዊድን : ምንጭ ከኢትዮጵያ ዛሬ)

 

 

Leave a Reply

Your email address will not be published. Required fields are marked *